မြန်မာအက္ခရာတွင် အဖို/အမ တည်ရှိခြင်းနှင့်ခွဲခြားထားပုံ
ပြင်သစ်စာ သင်နေတဲ့ ညီမ တယောက်က ပြင်သစ်စာမှာ အထီးအမ ခွဲတာတွေ ရှိပါလား ဆိုပြီး လာပြောလို့ ဗမာစာမှာလဲ လိင် ခွဲခြားထားတဲ့အကြောင်း ပြောပြရတယ်။ အဲဒိလို ပြောပြတဲ့အကြောင်း သူ့အစ်မ ကိုယ့်သူငယ်ချင်းကို ပြန်ပြောပြတော့ သူကလဲ ကိုယ်ပြောတာကို အခုမှ သိသတဲ့။
ကိုယ့်ပတ်၀န်းကျင်မှာလဲ နိုင်ငံတကာ ဘာသာစကား သုံးလေးမျိုး တတ်ပေမယ့် ဗမာစာ စာလုံးပေါင်း မမှန်တဲ့လူတွေက များနေတော့ အခုလိုပဲ စတေးတပ် ရေးလိုက်ပါတယ်။
ဗုဒ္ဓ၊ အက္ခရာ၊ ပုစ္ဆာ၊ အန္တရာယ်၊ တိရစ္ဆာန်၊ အဓိပ္ပါယ်၊ စတုတ္ထ …
ဥပမာ ပေးထားတဲ့ အထက်ပါ ပါဋ္ဌ်ဆင့် စကားလုံးတွေ အပါအ၀င် ဗမာစာမှာ ရှိတဲ့ လုံးဆင့် ပါဋ္ဌ်ဆင့်တွေကို လေ့လာကြည့်ပါ။ ဗမာစာ ရေးသားနည်းမှာ အသုံးပြုတဲ့ အထီးအမ စနစ်ကို တွေ့ရမှာပါ။
ဗမာစာမှာ ပါဋ္ဌ်ဆင့်တွေကို ရေးတဲ့အခါ ဘယ်အက္ခရာက ဘယ်အက္ခရာပေါ်မှာ ရှိရမယ်၊ ဘယ်သူကဖြင့် ဘယ်သူ့အောက်မှာ မရှိရဘူး ဆိုတာမျိုး သတ်မှတ်ချက် ရှိပါတယ်။ ဥပမာ ကကြီးနဲ့ ခကွေး ဆိုရင် ကကြီးက အမြဲတမ်း အပေါ်မှာ နေရပါတယ်။ စလုံးနဲ့ ဆလိမ်မှာ ဆလိမ်က ဘယ်တော့မှ အပေါ်မှာ မရှိရပါဘူး။ အဲဒါ အထီးအမ ကွဲလို့ပါပဲ။
နမူနာ ပေးထားတဲ့ ပုံကို ကြည့်ပါ။ ဘယ်ဘက်ပုံက အမှန်၊ ညာဘက်က အမှား ဖြစ်ပါတယ်။ ဘယ်ဟာက ဘာ့ကြောင့် မှန်ပြီး ဘယ်ဟာက ဘာ့ကြောင့် မှားလဲ ဆက်ပြောပြပါ့မယ်။ က၊ ခ၊ ဂ၊ ဃ၊ င ဆိုပြီး ငါးလုံးတတန်း စီရာမှာ အထီး အမ အထီး အမ အထီး ဆိုတဲ့ အစဉ်အတိုင်း စီထားတာ ဖြစ်ပါတယ်။
ကကြီးက အထီး ခကွေးက အမ၊ ဂငယ်က အထီး ဃကြီးက အမ နောက်ဆုံး င က အထီး ပြန်ဖြစ်ပါတယ်။
အဲဒီတော့ ဒုတိယ ပုံမှာလို ဟ ဠ အ ကို ဘယ်ဖက်စွန်းမှာ ကပ်ရေးလိုက်မယ် ဆိုရင် အမဖြစ်တဲ့ ဟက အထီးနေရာကို ရောက်သွားသလို သူ့ဘေးက အထီးဖြစ်က ဠ ကလဲ အမ နေရာကို ရောက်သွားတော့မှာပါ။
အဲဒိ ဟ ဠ အ သုံးလုံးကို ရှေးပညာရှိကြီးများက အလယ်မှာ နေရာ ချထားတာဟာ အလှသက်သက် မဟုတ်ပါဘူး။
ဒါဆိုရင် ဘယ်ဟာ အထီး ဘယ်ဟာ အမ သိနိုင်ကြပြီး ထင်ပါတယ်။ ရေးသားရာမှာတော့ … အထီးအထီးချင်း ဆင့်လို့ရတယ်။
အမအချင်းချင်း ဆင့်နိုင်တယ်။
အထီးအောက်မှာ အမကို ထားပြီး ဆင့်နိုင်တယ်။
အမအောက်မှာ အထီးကို ဘယ်တော့မှ မထားရ … စတဲ့ စည်းကမ်းတွေ ထားရှိပါတယ်။
နောက်တချက်က ဗိုလ်အက္ခရာ တပည့်အက္ခရာ ဆိုတာ ရှိပါသေးတယ်။ ငါးလုံးတတွဲ တန်းထားတဲ့ အတန်းတခုတိုင်းရဲ့ နောက်ဆုံးစာလုံးတွေဟာ ဗိုလ်တွေပါ။ ဥပမာ ကခဂဃင မှာ င အက္ခရာ၊ စဆဇစျည မှာဆိုရင် ည အက္ခရာ … သူတို့ဟာ ဗိုလ်အက္ခရာ ဖြစ်တဲ့အတွက် ရှေ့မှာ ရှိနေတဲ့ တပည့်အက္ခရာ လေးလုံးရဲ့ အပေါ်မှာ နေလို့ ရပါတယ်။
တခြား စည်းကမ်းတွေ အများကြီး ရှိပါသေးတယ်။ အခုကတော့ ဗမာစကားမှာ ကျားမခွဲခြားထားတဲ့ စနစ် ရှိတယ် ဆိုတာလေးကို ပြောပြတာပါ။ အမှားပါရင်၊ လိုအပ်တာရှိရင် ပြင်ပေး ဖြည့်ပေးပါခင်ဗျာ။ ပိုပြီး သိနိုင်သူတွေနဲ့ ဆွေးနွေးပြီး အတည်ပြုကြပါ။ သိပြီးသားတွေ ဖြစ်နေရင်လဲ မပြည့်အိုးမို့ ဘောင်ဘင်ခတ်တယ်ပဲ သဘောထားပြီး ကျော်သွားပေးကြဖို့ မေတ္တာရပ်ခံပါတယ်။
ငယ်ငယ်က နွေရာသီ ကျောင်းပိတ်ရက်တိုင်း ရွာဘုန်းကြီးကျောင်း ပြန်ပို့ပြီး စာသင်ခိုင်းသလို အိမ်မှာလဲ စာသင်ပေးခဲ့တဲ့ ကျေးဇူးရှင်ဖေဖေကို စိတ်က ကန်တော့ပါတယ်။ ပိတ်သတ်များ အားလုံး ကျန်းမာရွှင်လန်းကြပါစေ။
မြန်မာ့အက္ခရာစာလုံးတွေမှာ ကြီး ၄ ကြီး နဲ့ ကြီး
၂ ကြီးနဲ့ ငယ် ၂ ငယ်ရှိသေးသည် ။
သာရက အနေဖြင့် က ဃ ဏ ဠ / (ဃ - ဂ) (ဏ -န)
#winhlaingoo
Comments
Post a Comment